आयुर्वेदको चमत्कार: एकै डोजमा नर्सको वर्षौं पुरानो खोकी निको !

          भक्तपुरका आयुर्वेदिक चिकित्सक डा. नरेन्दप्रसाद गिरीले आफ्नो चिकित्सा अनुभव सुनाउँदै भनेका छन्, "आयुर्वेद रोग लाग्नै नदिने र लागिहालेमा उपचार गर्ने अद्भुत विज्ञान हो।" उनले हालै शिक्षण अस्पतालमा कार्यरत २४ वर्षीया एक नर्सको घटना सुनाए, जसलाई वर्षौंदेखि लगातार खोकी लागिरहेको थियो। टीबीको औषधि सेवन गरिरहे पनि उनको खोकी र स्वाँस्वाँ हुने समस्या कम भएको थिएन।

        ती नर्स भक्तपुर जिल्ला आयुर्वेद स्वास्थ्य केन्द्रमा डा. नरेन्द्रलाई भेट्न आइपुगिन्। डा. नरेन्द्रले उनको स्वास्थ्य परीक्षण गरे र टीबीको औषधि नियमित खान सल्लाह दिए। तर, खोकीको लागि उनले एक मात्रा आयुर्वेदिक औषधि दिए।

        त्यो एक मात्रा औषधिले यस्तो अचम्म काम गर्‍यो कि नर्सले तुरुन्तै राहत महसुस गरिन्। एक हप्तापछि फलोअपमा आउँदा उनले भनिन्, "डाक्टरसाप, एक डोज औषधिले नै ५० प्रतिशतभन्दा बढी खोकी ठिक भयो! यो त चमत्कार नै हो!" एक हप्तामा उनको ७५ प्रतिशत खोकी कम भइसकेको थियो र श्वासप्रश्वास पनि सहज भएको थियो।

        डा. नरेन्द्रले बताए, "ती नर्सले टीबीको औषधि पनि खाइरहेकी थिइन् र आयुर्वेदिक औषधि पनि सेवन गरिन्। पछि उनको खोकी पूर्ण रूपमा निको भयो र श्वासप्रश्वासको समस्यामा पनि धेरै सुधार आयो।"

            यति मात्र होइन, डा. नरेन्द्रले अर्को घटना पनि सुनाए। नरदेवी आयुर्वेद चिकित्सालयमा इन्टर्नसिप गर्दा २५ वर्षीया एक युवती पेट दुख्ने समस्या लिएर आइन्। उनले ग्यास्ट्रिकको औषधि खाइरहेकी थिइन्, तर डा. नरेन्द्रलाई उनको समस्या ग्यास्ट्रिक नभएको शंका लाग्यो। उनले अल्ट्रासाउन्ड गर्न सल्लाह दिएपछि युवतीको मिर्गौलामा पत्थरी भएको पत्ता लाग्यो। सही उपचारपछि उनको पेट दुख्ने समस्या समाधान भयो। डा. नरेन्द्रले भने, "मैले उनको उपचार त गरिनँ, तर सही सल्लाह दिएँ जसले गर्दा उनको रोग पहिचान भयो र उपचार सम्भव भयो।"

           भक्तपुरमा जन्मिएका डा. नरेन्द्रले आयुर्वेदमा स्नातक (बीएएमएस) र स्नातकोत्तर (एमडी) सम्मको अध्ययन सरकारी छात्रवृत्तिमा पूरा गरेका छन्। उनी हाल नुवाकोटस्थित आयुर्वेद तथा वैकल्पिक चिकित्सालयको प्रमुखको रूपमा कार्यरत छन्, जहाँ दैनिक सयौं बिरामी उपचारका लागि आउँछन्। डा. नरेन्द्रले आयुर्वेद चिकित्सा पद्धतिप्रति मानिसहरूको आकर्षण बढ्दै गएको अनुभव सुनाए। आफ्नो व्यस्त समयको बाबजुद पनि उनी आयुर्वेदसँग सम्बन्धित अनुसन्धानमा सक्रिय छन् र उनका लेखहरू विभिन्न जर्नलमा प्रकाशित छन्।

       यसरी, डा. नरेन्द्रका अनुभवले आयुर्वेद चिकित्सा पद्धतिको प्रभावकारिता र सही निदानको महत्त्वलाई उजागर गर्दछ।